சஹாபாக்கள் முத்திரை நபியின் சித்திரைப்பூக்கள்

#முத்திரை_நபியின்

#சித்திரைப்_பூக்கள்#

**************************

பொன் முலாம் பூசி

பூமாலை சூடி

பூஜிக்கப்பட்டு வந்த

பொய் தெய்வங்களுக்கு

மூடு விழா நடத்த வந்த

முத்திரை நபியின்

சித்திரைப் பூக்கள்!

அஞ்ஞான இருளகற்றி

மெய்-ஞான ஒளியேற்ற வந்த - அந்த

ஆன்மீகச் சூரியனின்

அஸ்தமனத்திற்குப் பின்

வெளிச்சத்தை விநியோகம் செய்த

விடி வெள்ளிகள்!

வரண்ட பாலையில்

வற்றாத நீரூற்றாய்

வசந்தத்தின் பூந்தென்றலாய்

வாராது வந்த வான் மழையாய்

முகில் கிழித்து முகம் காட்டும்

முற்றாத முழு நிலவாய் வந்துதித்த

முத்து நபியின் முத்துச் சிதறல்கள்! 

பொய் மையில் பூத்த - இந்தப்

பொன் மலர்கள்

பூமான் நபியோடு

புலம் பெயர்ந்த பின் - தங்கள்

காம்புகளைக்கூட காயப்படுத்தின! 

பிரவாகமெடுத்தோடிய 

மௌட்டீகத்திற்கு

தலை வணங்கிய 

நதிக்கரை நாணல்கள்- அவை

சத்திய வாளால் அறு பட்டு

ஏகத்துவ நெருப்பில் சுடு பட்டு

எதிர்ப்புக் கணைகளால் துளை பட்டு

பூபாளமிசைத்த புல்லாங்குழல்கள்! 

உயிர், உடைமைகளை

விலையாய் கொடுத்து

சொர்க்கத்தை சொந்தமாக்கிய

சொக்க தங்கங்கள்! 

இஸ்லாம் எனும்

அருட் பெரும் ஜோதியை

மோதி அணைத்திட 

சீறி வந்த மக்கத்து புயலை - தங்கள்

மூச்சுக் காற்றால் முறியடித்த

சொர்க்கத்து நாயகர்கள்! 

போர்க் களங்களை

பொழுது போக்கும் பூங்காக்களாய்

விழுப்புண்களை 

வீரத்தின் விருதுகளாய்

உயிரிழப்பை

உன்னத மோட்சமாய் - எண்ணி

வாளின் நிழலில் வாழ்திட்ட

வள்ளல் நபியின் வாகைப் படை - அது

அருளாளன் அல்லாஹ்வின் அதிசயப்படை! 

மறுமை வாழ்வே

நிலையென உணர்ந்து

வறுமை வாழ்வை

வலிந்து ஏற்று - அதில்

பொறுமையோடு வாழ்ந்திருந்த

பெருமை மிகு அடையாளங்கள்! 

கருணை நபியின்

அருமை உணர்ந்து

அல்லும் பகலும் - அவர் தம்

நிழலாயிருந்து

கண்ணின் இமை போல்

காவல் புரிந்த

காத்தமுன் நபியின்

கருப்பு பூனைகள்! 

நெஞ்சம் நிறைந்த 

நேச நபியின் ஆசை முகத்தை  

அருகிருந்து பார்த்திருந்து

ஆவல் ததும்ப காத்திருந்து

செம்மல் நபியின்

செவ்விதழ் சிந்திய முத்துக்களை

ஆரமாக்கி அணிந்து கொண்டார்கள்

அதனால்தான்... 

அல்லாஹ் அவர்களை

பொருந்திக் கொண்டான்

(ரலியல்லாஹு அன்ஹு ம்) எனும்

அடைமொழிக்கு ஆளானார்கள்! 

-மௌலவி K.S.அப்துர் ரஹ்மான் நூரி-

                     வடகரை-627812