கியாமத் நாளின் அடையாளம் :72

கியாமத் நாள் சமீபத்தில் நடக்கும் (சிறிய) அடையாளங்கள் 72

நபி (ஸல்) அவர்கள் கூறியதாக ஹுதைபா (ரலி) அவர்கள் அறிவிக்கிறார்கள் யுக முடிவு (கியாமத்) நாளின் சமீபத்தில் 72 அடையாளங்கள் வரும்... அவை ....

1.   தொழுகையை மரணிக்கச் செய்வார்கள். அதாவது      தொழுகைக்கு முக்கியத்துவம் தர மாட்டார்கள். அதை முறைப்படி நிறைவேற்ற மாட்டார்கள்.

2. அமானித பொருளை வீணாக்கி விடுவார்கள். அதாவது அமானிதப் பொருள்களை கொடுத்து வைத்திருந்தால் அதில் மோசடி செய்வார்கள்.

3. வட்டியை சாப்பிடுவார்கள்.

4. பொய்யை (ஹலாலாக) ஆகுமாக்கி விடுவார்கள். அதாவது ஒரு கலையாக சாமர்த்தியமாக நினைப்பார்கள்.

5. கட்டிடங்களை உயர உயர கட்டுவார்கள்.

6. உலக ஆதாயங்களுக்காக மார்க்கத்தை விற்பார்கள்.

7. இலேசான விஷயத்திற்கெல்லாம் கொலை செய்வார்கள்.

8. உறவினர்களை துண்டித்து வாழ்வார்கள்.

9. தீர்ப்புகள் நியாயமானதாக இருக்காது.

10. பொய் உண்மையாகும்.

11. ஆண்கள் பட்டாடை அணிவார்கள்.

12. அநீதி பெருகிவிடும்.

13. விவாகரத்து (தலாக்) அதிகமாகிவிடும்.

14. திடீர் மரணம் அதிகமாகிவிடும்.

15. மோசடிக் காரர்களை மக்கள் நம்பிக்கையாளர்கள் என நினைப்பார்கள்.

16. நம்பிக்கையாளர்களை மக்கள் மோசடிக்காரர்கள் என நினைப்பார்கள்.

17. பொய்யனை மக்கள் மெய்யனாக ஆக்குவார்கள்.

18. மெய்யனை மக்கள் பொய்யனாக ஆக்குவார்கள்.

19. அவதூர்கள் (வீண்பழிகள் சுமத்துவது) பரவலாகிவிடும்.

20. மழை பொழியாது.

21. குழந்தைகள் அதிகம் பெற்றெடுப்பதை வெறுப்பார்கள்.

22. தகுதி குறைந்தவர்கள் உயர்ரக வாழ்க்கை வாழ்வார்கள்.

23. கண்ணியத்திற்குரியவர்கள் வசதி வாய்ப்பின்றி வாழ்வார்கள்.

24. தலைவர்களும், மந்திரிகளும், பொய்யர்களாக 

இருப்பார்கள்.

25. நம்பிக்கைக்கு உரியவர்கள் கூட மோசடி செய்வார்கள்.

26. பொறுமையாளர்கள் அநீதம் புரிவார்கள்.

27. குர்ஆனை ஓதிக்கொண்டே பாவங்கள் செய்வார்கள்.

28. மக்கள் மிருகங்களின் தோலினாலான ஆடையை அணிவார்கள்.

29. இவ்விதம் உயர்ரக ஆடைகளை அணிந்தாலும் அவர்களின் உள்ளங்கள் செத்த பிணங்களைவிட  மோசமானதாக இருக்கும்.

30. வாழ்க்கை விஷத்தை விட கசப்பான தாகவே இருக்கும்.

31. தங்க பயன்பாட்டில் இருக்கும்.

32. வெள்ளி (பயன்படுத்துதல்) குறைந்து விடும்.

33. பாவமான செயல்கள் அதிகமாகிவிடும்.

34. பாதுகாப்பு குறைந்துவிடும்.

35. குர்ஆன் பிரதிகள் அலங்கரிக்கப்படும்.

36. பள்ளிவாசல்கள் அலங்கரிக்கப்படும்.

37. மினராக்கள் உயர உயரமாக கட்டுவார்கள்.

38. மனித உள்ளங்கள் மாசு படிந்திருக்கும்.

39. மதுபானங்கள் அருந்தப்படும்.

40. குற்றங்களுக்குரிய ஷரீஅத் தண்டனைகள் நிறைவேற்றப்படாது.

41. அடிமைப்பெண் (தனக்கு கட்டளையிடும்) எஜமானியைப் பெற்றெடுப்பாள். (அதாவது பெண்மக்கள் தனது தாயை வேலைக்காரியைப் போன்று வழிநடத்துவார்கள்.)

42. செருப்பில்லாமல் நடப்பவர்கள், ஆடையின்றி 

இருப்பவர்கள் கூட தலைவர்களாக ஆகிவிடுவார்கள்.

43. கணவருடன் மனைவி வியாபாரத்தில் ஈடுபடுவாள்.

44. ஆண்கள் பெண்களைப் போன்று நடிப்பார்கள்.

45. பெண்கள் ஆண்களைப் போன்று நடிப்பார்கள்.

46. அல்லாஹ் அல்லாத உலக வஸ்துக்களின் மீது சத்தியம் செய்வார்கள்.

47. முஸ்லிம் பொய் சாட்சி கூறத் தயாராகி விடுவான்.

48. அறிமுகம் உள்ளவர்களுக்கு மட்டும் ஸலாம் கூறுவார்கள்.

49. தீனுக்காக அல்லாமல் உலக ஆதாயத்திற்காக கல்வி கற்பார்கள்.

50. மறுமையுடைய செயலைச் செய்து உலகத்தை சம்பாதிப்பார்கள்..

51. கனிமத் பொருட்களை தங்கள் சொந்த பொருள்களைப் போன்று பயன்படுத்துவார்கள்.

52. அமானிதப் பொருள்களை போரில் கிடைத்த (கனிமத்) பொருளைப் போன்று எடுத்துக் கொள்வார்கள்.

53. ஜகாத் கொடுப்பதை அபராதமாக நினைப்பார்கள்.

54. கூட்டத்தில் இழிவுக்குரியவன் அவர்களுக்குத் தலைவராகி விடுவான்.

55. மகன் தந்தையை நோவினை செய்வான்.

56. தனது தாயை வெறுத்து விடுவான்.

57. தனது நண்பனுக்கு கேடு செய்வான்.

58. கணவன் மனைவிக்கு கட்டுப்பட்டு நடப்பான்.

59. தீயவர்களின் சப்தம் பள்ளிவாசல்களில் அதிகமாகிவிடும்.

60. பாட்டுபாடும் பெண்கள் கண்ணியம் செய்யப்படுவார்கள்.

61. இசைக் கருவிகள் அதிகமாகிவிடும்.

62. நடக்கும் பாதைகளில் மதுபானங்கள் அருந்துவார்கள்.

63. பாவம் செய்வதை பெருமையாக கருதுவார்கள்.

64. மக்கள் நீதத்தை லஞ்சம் கொடுத்து மாற்றுவார்கள்.

65. காவலர்கள் அதிகமாக இருப்பார்கள்.

66. இசையைப் போன்று குர்ஆனை ஓதுவார்கள்.

67. விலங்கினங்களின் தோலைப் பயன்படுத்துவார்கள்.

68. பிற்காலத்தவர் முற்காலத்தவர்களை திட்டுவார்கள், சாபமிடுவார்கள், பின்பு நபி (ஸல்) அவர்கள் கூறினார்கள் இத்தகைய பாவங்கள் ஏற்படும்போது எதிர் பாருங்கள்.

69. சிகப்பு சூறாவளி காற்று அல்லாஹ்வின் புறத்திலிருந்து வீசும்.

70. பூகம்பம் ஏற்படும்.

71. வானத்திலிருந்து கல்மாரி பொழியும்.

72. மனிதர்களின் உருவங்களை உருமாற்றம் செய்யப்படும் மற்றும் பல அடையாளங்கள் நிகழும்.