*பராஅத் இரவு பற்றி குத்பு நாயகம் பேசுகிறார்கள்*
சங்கை மிக்க ஷஅபான் மாதத்தின் மத்திய இரவிற்கு பராஅத் இரவு என்றழைக்கப்படும்.
பராஅத் என்னும் பாக்கியம் பெற்ற இனிய இவ்விரவின் இனிமையையும் மகிமையினையும் குறித்து குவலயத்திரு குருநாதர் குத்புல்அக்தாப் கௌது நாயகம் முஹ்யித்தீன் அப்துல் காதிர் ஜீலானி ரழியல்லாஹு அன்ஹு அவர்களின் ஞானக் கருவூலமாம் ‘குன்யத்துத்தாலிபீன்’ எனும் கிரந்தத்தின் சாரமே இக்கட்டுரை.
பராஅத் இரவைப் பற்றிய ஏராளமான ஹதீஸ் சான்றுகள் இருக்கின்றன. அவற்றை முறைப்படி சுன்னத் வல் ஜமாஅத் அறிஞர்கள் சமூகத்திற்கு வழங்கிக் கொண்டே இருக்கிறார்கள்.
இது கௌது நாயகம் ரழியல்லாஹு அன்ஹு அவர்களின் ஆன்மீக சீடர்களுக்காக, அவர்கள் அமல்களில் ஆர்வம் செலுத்துவார்கள் என்பதற்காக எழுதப்பட்ட கட்டுரை.
*பெருநாள்*
குத்பு நாயகம் ரழியல்லாஹு அன்ஹு அவர்கள் கூறுகிறார்கள்:
ஈதுல் பித்ரு, ஈதுல் அழ்ஹா இவ்விரு நாட்களும் முஸ்லிம் மனிதர்களுக்கு பெருநாளாக அமைந்தது போல், வானவர்களுக்கும் இரு பெருநாள் உண்டு.
அவை:
1) லைலதுல் பராஅத்
2) லைலதுல் கத்ரு
அதற்கான விளக்கத்தையும் அவர்களே கூறுகிறார்கள். மனிதர்கள் உறங்குபவர்கள். எனவே, அல்லாஹ் அவர்களுக்கு பகலிலும், உறக்கமில்லா வானவர்களுக்கு இரவிலும் பெருநாளை அமைத்தான். அந்த இரவிலும் யார் விழித்திருந்து வணக்கம் புரிவார்களோ அவர்களுக்காக வானவர்களும் பிழை பொறுக்கத் தேடுவர்.
மேலும் பராஅத் இரவு தெளிவு படுத்தப்பட்டதையும் லைலதுல் கத்ரு இரவு மறைக்கப்பட்டதையும் பின் வருமாறு விவரிக்கிறார்கள்.
லைலதுல் கத்ரு, அருள் சொரியும் இரவு, கருணாகரன் அல்லாஹ் தன் கருணையை அள்ளி வழங்கும் அந்த இரவு ஒன்றே போதும் என்று குறுமதி கொண்டு ஏனைய கால வழிபாடுகளை விட்டு விடக் கூடும். எனவே, லைலதுல் கத்ரு மறைக்கப்பட்டது.
பராஅத் இரவு தீர்ப்பு வழங்கப்படும் இரவு, கட்டளைகள் இறங்கும் இரவு அந்த இரவில் மகிழ்ச்சியும் உண்டு, மன நொம்பலமும் உண்டு.
அவர்களின் எண்ணங்கள் ஏற்கப்படுவதும் உண்டு. எடுத்து ஏறியப்படுவதும் உண்டு. நலமும், நஷ்டமும் நிறைந்த இவ்விரவை பயன்படுத்தி நன்மையை பெற்றுக் கொள்வதற்காக இறைவன் பராஅத் இரவை தெளிவுபடுத்தினான்.
*சோபனம்*
திரு நபி ஸல்லல்லாஹு அலைஹி வஸல்லம் அவர்களின் தின்ணைத் தோழர்களில் ஒருவரும், பூமான் நபியின் இதயத்தில் இடம் பெற்ற ஹதீது கலையின் சக்கரவர்த்தியுமான அபூ ஹுரைறா ரழியல்லாஹு அன்ஹு அவர்கள் அறிவிக்கிறார்கள்.
ஒரு நாள் இரவு, வானவர் கோமான் ஜிப்ரீல் அலைஹிஸ்ஸலாம் அவர்கள், அருமை நபி ஸல்லல்லாஹு அலைஹி வஸல்லம் அவர்களிடம் வந்து,
நாயகமே, தலையை உயர்த்தி வானத்தை பாருங்கள் என்றார்கள். தலையை உயர்த்திய தாஹா நபியவர்கள் இது எந்த இரவு என வினவினார்கள்.
இந்த இரவில் இறைவன் தன் அருள் வாசலில் பல வாசலை திறந்து விட்டான்.
இறைவனுக்கு இணை வைத்தவர்கள் குறி, ஜோதிடம், மது, மாது, வட்டி இவைகளில் ஈடுபடுவோரை தவிர்த்து மற்றோரை மன்னித்து விட்டான். அவர்களும் கூட தன் பாவம் உணர்ந்து தவ்பா செய்வார்களாயின் அவர்களையும் அல்லாஹ் மன்னிப்பான் என்றார்கள்.
இரவின் நாளிலொரு பகுதி சமீபித்த போது ஜிப்ரீல் அலைஹிஸ்ஸலாம் இறங்கி வந்து, நாயகமே, தலையை உயர்த்துங்கள் என்றார்கள். அவ்வமயம் சுவனத்தின் வாசல் திறக்கப்பட்டிருந்தது.
முதல் வாசலில் நின்றிருக்கும் வானவர்
طوبى لمن ركع في هذه الليلة
இந்த இரவில் ருகூவு செய்பவர்களுக்கு சோபனம் என்றார்.
இரண்டாம் வாசலின் வானவர்
طوبى لمن سجد في هذه الليلة
இந்த இரவில் ஸஜ்தா செய்பவர்களுக்கு சோபனம் என்றார்.
மூன்றாம் வாசலின் வானவர்
طوبى لمن دعا في هذه الليلة
இந்த இரவில் துஆ (பிரார்த்தனை) செய்வோருக்கு சோபனம் என்றார்.
நான்காம் வாசலின் வானவர்
طوبى للذاكرين في هذه الليلة
இந்த இரவில் இறை தியானத்தி(திக்ரி)ல் ஈடுபடுவோருக்கு சோபனம் என்றார்.
ஐந்தாம் வாசலின் வானவர்
طوبى لمن بكى من خشية الله في هذه الليلة
இந்த இரவில் யார் அல்லாஹ்வைப் பயந்து அழுதாரோ அவருக்கு சோபனம் என்றார்.
ஆறாம் வாசலின் வானவர்
طوبى للمسلمين في هذه الليلة
இந்த இரவில் முஸ்லிம்களுக்கு சோபனம் என்றார்.
ஏழாம் வாசலின் வானவர்,
هل من سائل فيعطى سؤاله
யாரும் வேண்டுவோர் உண்டா? அவரின் தேவை வழங்கப்படும் என்றார்.
எட்டாம் வாசலின் வானவர்
هل من مستغفرفيغفرله
பிழைகளை மன்னிக்க வேண்டுவோர் யாரும் உண்டா? அவரின் பிழைகள் மன்னிக்கப்படும் என்றார்.
ஜிப்ரீலே எதுவரை சுவன வாசல்கள் திறந்திருக்கும் என ஏந்தல் நபி ஸல்லல்லாஹு அலைஹி வஸல்லம் அவர்கள் வினவிய போது, இரவின் முற்பகுதியிலிருந்து ஃபஜ்ரு வரை என பதிலளித்தார்கள்.
كم من كفن مغسول
و صاحبه في السوق مشغول
و كم من قبر محفور
و صاحبه بالسرور مغرور
و كم من فم ضاحك
و هو عن قريب هالك
وكم من منزل كمل بناؤه
و صاحبه قد ازف فناؤه
எத்தனையோ பேரின் மரண ஆடைகள் (கபன்) கழுவப்படுகிறது. அவர்களோ கடை வீதிகளில் வேலைகளில் ஈடுபட்டிருப்பார்கள்.
எத்தனையோ பேரின் கப்ருகள் தோண்டப்பட்டிருக்கும். அவர்களோ மகிழ்ச்சியிலும், மறதியிலும் மூழ்கிப் போயிருப்பார்கள்.
எத்தனையோ வாய்கள் சிரித்துக் கொண்டிருக்கும், ஆனால் அவர்களோ நாசத்தை நெருங்கிக்கொண்டிருபார்கள்.
கட்டி முடிக்கப்பட்டு நிறைவை எட்டிக் கொண்டிருக்கும் தன் மாளிகைகளின் கற்பனையில் மூழ்கியிருப்பார்கள். ஆனால், அவர்களின் மரண வாசலோ திறந்து வைக்கப்பட்டிருக்கும்.
இது போன்று ஏமாற்றங்கள் நிகழ்ந்து விடாமல் அல்லாஹ் பாதுகாப்பானாக. ஆமீன்.
*பராஅத் இரவை உயிர்ப்பித்து கப்ரில் உய்வடைவோம்*
முஹம்மது பின் அப்துல்லாஹ் ஜாஹிதி ரஹ்மத்துல்லாஹி அலைஹி அவர்கள் கூறுகிறார்கள்.
எனது நண்பர் ஒருவர் இறந்து விட்டார். ஆப்த நண்பர் அவரை நானே முன் நின்று குளிப்பாட்டி, தொழ வைத்து, நல்லடக்கம் செய்தேன். அதன் பின்னர் எட்டு மாதங்கள் வரை அவரை மறந்து விட்டேன். ஒரு நாள் அவரின் ஞாபகம் என்னுள் ஏற்பட்டது. அன்றிரவே அவரை கனவில் கண்டேன்.
பேதலித்துப் போன முகமாய், மஞ்சணிந்து அகோரமாக இருந்தார். அதிசயித்துப் போன நான் பரிதாபப் பட்டவனாக அவருக்கு ஸலாம் சொன்னேன். அவரும் பதில் கூறவில்லை. ஏன் பதில் ஸலாம் கூறாதிருக்கிறீர்? எனக் கேட்டேன். பதில் ஸலாம் கூறுவதும் ஒரு வகை வணக்கத்தை சார்ந்தது. எங்களுக்கோ வணக்கத்தின் வாசல் அடைக்கப்பட்டு விட்டது என்றார்.
ஏன் உம் முகம் கருத்து சுருங்கி போனது எனக் கேட்டேன். ஆமாம் என்னை நீங்கள் அடக்கி விட்டு சென்ற பின் ஒரு மலக்கு வந்தார். கடந்து போன என் வாழ்வின் தீய செயல்களை எடுத்துக் காட்டினார்.தூண் போன்ற தடியைக் கொண்டு என்னை அடித்தார். எனது கப்ரு எனது இரட்சகனை நீ வெட்கப்பட வேண்டாமா? என்று கேட்டு என்னை நெருக்கியது.
அதனால், எனது இரு விலா எலும்புகளும் ஒன்றோடு ஒன்று நெருங்கி நொறுங்கிப் போய் விட்டது.
இந்த தண்டனை இந்த பிறை பிறக்கும் வரை இருந்தது. ஷஅபான் பிறை பிறந்த உடன் வானவரே இந்த மனிதரை வேதனை செய்வதை நிறுத்தும். இந்த மனிதன் இந்த மாதத்தின் மத்திய பராஅத் இரவில் கண் விழித்து வணங்கினான். அன்றைய பகல் பொழுதில் நோன்பிருந்தான் என ஒரு அசரீரீ வந்தது. பின்னர் சுவர்க்கத்தைக் கொண்டும், ரஹ்மத் கொண்டும் எனக்கு நன்மாராயம் சொல்லப்பட்டது என்று அவர் கூறியதைக் கேட்டதும் அதிசயமடைந்து கண் விழித்தேன். (நூல் ஜுஹ்ரதுர் ரியாழ்)
வல்ல ரஹ்மான் இது போன்ற இரவுகளின் புனிதத்தால் விதிகள் நிர்ணயிக்கப்படும் இவ்விரவில் விழிகள் திறந்து வணக்கம் செய்வதற்கு தவ்ஃபீக் செய்வானாக. ஆமீன்.
அவனின் அருள் பெற்ற நல்லோர்களின் கூட்டத்தில் நம்மையும் சேர்ப்பானாக,
நமது நாயகம் ஸல்லல்லாஹு அலைஹி வஸல்லம் அவர்களின் உண்மைப் பேரன்பை உள்ளத்தில் நிறைந்திருக்கச் செய்வானாக ஆமீன்.
ஸல்லல்லாஹு அலா முஹம்மத் யாரப்பி ஸல்லி அலைஹி வஸல்லிம்.
தொகுப்பு: TSA அபூதாஹிர் ஃபஹீமீ மஹ்ழரி
ஆசிரியர் - அல் அஸ்ரார் மெய்ஞான மாத இதழ்
98415 67213
*பாக்கியம் நல்கும் பராஅத் இரவு*
*பராஅத் இரவு என்றால் என்ன ?*
ஷஃபான் மாதம் பிறை 15ம் இரவுக்கு லைலத்துல் முபாரக்கா (பரக்கத்செய்யப்பட்டஇரவு), லைலத்துர் ரஹ்மா (ரஹ்மத் செய்யப்பட்ட இரவு), லைலத்துல் பராஅத் (நரக விடுதலை பெறும் இரவு) என்றெல்லாம் கூறப்படும்.
'பராஅத்' எனும் அரபி சொல்லுக்கு விடுதலை என்பது பொருளாகும். புனித மிக்க அவ்விரவில் நரகவாசிகள் விடுதலை பெறுகிறார்கள் என்பதால் அந்த இரவிற்கு 'லைலதுல்பராஅத்' (விடுதலைபெறும்இரவு) என பெயர் வந்தது. (நூல்: ரூஹுல் பயான்)
*கிப்லா திருப்பப்பட்டதும் பராஅத் நாளில் தான்*
மா நபி ஸல்லல்லாஹு அலைஹி வஸல்லம் அவர்கள் மதீனாவிற்கு சென்ற பின் மஸ்ஜிதுல் அக்ஸாவை நோக்கி தொழுமாறு திருப்பப்பட்டார்கள். அப்படியே தொழுது வந்தார்கள். ஆனால் அவர்களின் உள்ளமெல்லாம் புனித கஅபாவை முன் நோக்கித் தொழ வேண்டும் என்ற ஆசையே நிறைந்திருந்தது.
எனவே எழில் கஅபாவை முன்னோக்க வேண்டும் என்ற பேரார்வத்தால் தொழுகையிலும் கூட தன் தலையை உயர்த்தி வஹி வருகிறதா என பார்த்து வந்தார்கள்.
அண்ணலின் பிரியம் இங்கனம் இருக்க அல்லாஹ்விற்கு மட்டும் என்ன இன்னொரு பிரியமா?
தன் நேசர் விரும்புவதையே தானும் விரும்பும் நாயன் நாயகத்தின் எண்ணத்தை ஏற்று அருள் வசனத்தை அருளினான்.
قَدْ نَرَى تَقَلُّبَ وَجْهِكَ فِي السَّمَاءِ فَلَنُوَلِّيَنَّكَ قِبْلَةً تَرْضَاهَا فَوَلِّ وَجْهَكَ شَطْرَ الْمَسْجِدِ الْحَرَامِ
(நபியே!) உமது முகம் (பிரார்த்தனை செய்து) அடிக்கடி வானத்தை நோக்குவதை நாம் காண்கிறோம். ஆதலால், நீர் விரும்பும் கிப்லா(வாகிய மக்கா)வின் பக்கமே நாம் உம்மை நிச்சயமாகத் திருப்புகிறோம். எனவே, நீர் (தொழும்போது மக்காவிலுள்ள) ‘மஸ்ஜிதுல் ஹராமின்' பக்கமே உமது முகத்தைத் திருப்புவீராக.
(அல்குர்ஆன் 2: 144)
வரலாற்று சிறப்புமிக்க இந்த நிகழ்வு நடைபெற்றதும் ஷஃபான் மாதத்தின் மத்திய நாளிலே தான் என்று தஃஸீர் இபுனு கதீரில் கூறப்பட்டிருக்கிறது. எனினும் இத்தகவலை இக்காலத்தின் தஃஸீர்களிலே இருட்டடிப்பு செய்யப்பட்டிருக்கிறது என்பதையும் நினைவில் கொள்க.
*ஸலவாத் ஆயத் அருளப்பட்டதும் பராஅத்திலே தான்*
إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا
நிச்சயமாக அல்லாஹ்வும் அவனுடைய வானவர்களும் நபியின் மீது ஸலவாத்துச் சொல்கின்றார்கள். ஆகவே, நம்பிக்கையாளர்களே! நீங்களும் அவர்கள் மீது ஸலவாத்துச் சொல்லி ஸலாமும் கூறிக் கொண்டிருங்கள். (அல்குர்ஆன் 33:56)
என்ற சிறப்பு மிகு ஆயத் அருளப்பட்டதும் இந்த நாளிலே தான் என்று இமாம் கஸ்தலானி ரஹ்மதுல்லாஹி அலைஹி அவர்கள் கூறியதாக "மாதா ஃபீ ஷஃபான்" என்ற நூலில் புனித மக்கா ஷரீஃப் முஃப்தி அஸ்ஸெய்யிது அலவி மாலிகி ரஹ்மதுல்லாஹி அலைஹி அவர்கள் கூறுகிறார்கள்.
*இரவில் தொழுகை, பகலில் நோன்பு*
கண்மணி நாயகம் ஸல்லல்லாஹு அலைஹி வஸல்லம் அவர்கள் கூறினார்கள்:
ஷஃபான் மாதத்தின் 15 ம்நாள் வந்து விட்டால் அந்நாளில் இரவில் நின்று வணங்குங்கள், பகலில் நோன்பு வையுங்கள்.
ஏனென்றால், நிச்சயமாக இறைவன் (அவ்விரவில்) கூறுகிறான்: என்னிடம் பாவமன்னிப்பு தேடுவோர் உண்டா? அவர்களை நான் மன்னித்து விடுகிறேன். என்னிடம் ரிஸ்க் (இரணம்) வேண்டுவோர் உண்டா? அவர்களுக்கு ரிஸ்க் தருகிறேன். என்னிடம் கேட்போர் உண்டா? அவர்களுக்கு நான் வழங்குகிறேன். இவ்வாறு சுபுஹ் நேரம்வரை சொல்லிக் கொண்டேயிருப்பான்.
அறிவிப்பாளர்: ஸையிதுனாஅலி (ரலியல்லாஹுஅன்ஹு)
நூல்கள்: இப்னுமாஜா 1388, பைஹகி - ஃபீ ஷுஃபில் ஈமான் 3822
*கப்ரு ஜியாரத்*
அன்னை ஆயிஷா ரலியல்லாஹு அன்ஹா அறிவிகிறார்கள்:
ஒருநாள் இரவு நபிகள் நாயகம் ஸல்லல்லாஹு அலைஹி வஸல்லம் அவர்களை நான் காணவில்லை. (உடனே எங்கே போயிருப்பார்கள் என்று நினைத்துக் கொண்டு அவர்களைத் தேட ஆரம்பித்தேன்).
அவர்களோ ஜன்னத்துல்பகீஃ என்ற மதீனாவிலுள்ள முஸ்லிம்களின் மையவாடியில் தன் தலையை வானத்தின் பக்கம் உயர்த்தியவர்களாக இருந்தார்கள்.
(நான் திகைத்துப் போய் இருப்பதைக்கண்ட) நாயகம் ஸல்லல்லாஹு அலைஹி வஸல்லம் அவர்கள் அல்லாஹ்வும் ரஸூலும் உங்களுக்கு அநீதம் செய்துவிடுவார்கள் என்று பயப்படுகிறீர்களோ என்றுகேட்டார்கள்.
நான் அதற்கு தங்களுடைய மனைவிமார்களில் எவருடைய வீட்டிற்கேனும் தாங்கள் சென்றிருப்பீர்கள் என்று தான் நினைத்தேன் என்று கூறினேன்.
அப்போது நாயகம் ஸல்லல்லாஹு அலைஹி வஸல்லம் அவர்கள் நிச்சயமாக அல்லாஹு தஆலா (பராஅத்துடைய இரவாகிய) ஷஃபான் மாதத்துடைய மத்திய இரவில் முதலாவது வானத்தில் இறங்கி பனீ குலைப் என்ற கோத்திரத்தார் வைத்திருக்கும் ஆடுகளினுடைய முடிகளின் எண்ணிக்கையை விட அதிகமானவர்களுக்கு பாவங்களை பொறுத்தருள்கிறான் என்று கூறினார்கள்.
(நூல்கள்; திர்மிதி 739, இப்னுமாஜா 1389, அஹ்மத் 6-238, மிஷ்காத் 1299)
இதிலிருந்து பராஅத் இரவைப் போன்று இறையருள் இறங்கும் இரவுகளில் கப்று ஜியாரத் விரும்பத் தக்கது என்பதும் தெளிவாகின்றது.
அன்னை ஆயிஷா ரலியல்லாஹு அன்ஹா அறிவிகிறார்கள்:
பராஅத் இரவின் மகிமையைப் பற்றி மாநபி ஸல்லல்லாஹு அலைஹி வஸல்லம் அவர்கள் ஷஃபான் மாதத்தினுடைய சரிபாதியின் இரவாகிய இந்த இரவில் என்னென்ன இருக்கின்றது என்று உங்களுக்குத் தெரியுமா? என்று என்னைப் பார்த்து கேட்டார்கள்.
அந்த இரவில் என்ன இருக்கின்றது நாயகமே! என்று நான் கேட்டேன்.
அப்போது நாயகம் ஸல்லல்லாஹு அலைஹி வஸல்லம் அவர்கள் இந்த இரவில் தான் இந்த வருடத்தில் பிறக்க விருக்கின்ற குழந்தைகள், இந்த வருடத்தில் இறக்க விருக்கின்ற மனிதர்கள் பற்றிய விபரங்களை எழுதப்படுகின்றது. மேலும் இந்த இரவில் தான் அவர்களின் அமல்கள் உயர்த்தப்படுகின்றன. இந்த இரவில் தான் அவர்களின் உணவுகளும், இறக்கி வைக்கப்படுகின்றது.
நூல் : பைஹகி
மிஷ்காத் 1/ 305, 1302
கண்மணி நாயகம் ஸல்லல்லாஹு அலைஹி வஸல்லம் அவர்கள் கூறினார்கள்:
ஜிப்ரயீல் அலைஹிஸ்ஸலாம் என்னிடம் வந்து தெரிவித்தார்கள். இந்த இரவு ஷஃபான் மாதத்தின் மத்திய இரவாகும். கல்ப் கூட்டத்தாரின் ஆடுகளிலுள்ள உரோமங்களின் எண்ணிக்கை அளவிற்கு நரகவாசிகளை அல்லாஹ் இந்த இரவில் விடுதலை வழங்குகிறான்.
( பைஹகீ ஃ பீ ஷுஃபில் ஈமான் 3837)
*மன்னிக்கப்படாதோர்*
கண்மணி நாயகம் ஸல்லல்லாஹு அலைஹி வஸல்லம் அவர்கள் கூறினார்கள்:
ஷஃபான் மாதத்தின் மத்திய இரவில் இறைவன் அடியார்களை நெருங்கி வருகிறான். இணை வைப்பவன் மற்றும் விரோதம் கொள்பவன் இவ்விருவரைத் தவிர மற்ற எல்லோரையும் மன்னிக்கிறான்.
அறிவிப்பாளர்: ஹழ்ரத்முஆத்இப்னுஜபல் (ரலியல்லாஹுஅன்ஹு)
நூல்கள்: இப்னுஹிப்பான் 5665, தப்ரானி (முஃஜமுல்அவ்ஸத்) 6776
அபூமூஸல்அஷ்அரீ (ரலியல்லாஹுஅன்ஹு) இப்னுமாஜா 1390
இவர்களும் மனம் வருந்தி தவ்பா செய்தால் அல்லாஹ் மன்னிப்பான்.
கண்மணி நாயகம் ஸல்லல்லாஹு அலைஹி வஸல்லம் அவர்கள் கூறினார்கள்:
ஷஃபான் மாதம் மத்திய இரவில் அல்லாஹு தஆலா தனது அடியார்களை நெருங்கி வருகிறான். இருவரைத் தவிர மற்றெல்லோரையும் மன்னித்து விடுகிறான். 1.பகைமை பாராட்டுபவன் 2. கொலை செய்தவன்.
அறிவிப்பவர்: ஹழ்ரத் அப்துல்லாஹ் இப்னு அமர் (ரலியல்லாஹுஅன்ஹு, நூல்:அஹ்மத் 6642)
இந்த இரவில்
ஏற்றம் மிகுந்த இவ்விரவில் செய்ய வேண்டிய நற்கிரியைகளில் இறை மறையின் இதயப் பகுதியாம் சூரத்துல் யாஸீன் மூன்று முறை ஓத வேண்டும்.
1) முதல் முறையில் (அல்லாஹ், ரசூலுக்கு வழிபட்டு) நீண்ட ஆயுள் வாழ்வதற்காக ஓத வேண்டும்.
2) இரண்டாம் முறையில் நோய் நொடிகள், சோதனைகள் துன்பங்களை விட்டு நிவாரணமும், சுகமும், கார்மாணமும் தேடி ஓத வேண்டும்.
3) நம்முடைய தேவைகளில் யாரிடமும் எதற்காகவும் முன்னிற்காமல் தன்னிறைவு பெறுவதற்காகவும் ஓதி துஆ செய்து கொள்ள வேண்டும்.
என்னுடைய மாதம் என ஏந்தல் நபி ஸல்லல்லாஹு அலைஹி வஸல்லம் அவர்களால் ஏற்றுக் கொள்ளப்பட்ட இந்த மாதத்தின் எழிலோங்கும் இவ்விரவில் அண்ணல் நபி ஸல்லல்லாஹு அலைஹி வஸல்லம் அவர்கள் மீது அதிகமதிகம் ஸலவாத் ஓத வேண்டும்.
ஏழை, எளியவர்கள், பசியாளிகள் இவர்களுக்கு உணவு வழங்கி அவற்றின் நன்மையை மரணித்து விட்ட நம் பெற்றோர், உற்றார் உறவினர்களுக்கு சேர்த்து வைக்க வேண்டும்.
நம் அமல்கள் இறைவனிடம் எடுத்துச் செல்லப்படும். இந்நாளின் பகல் பொழுதில் நோன்பிருப்பதும் சுன்னத்தாகும்.
*தொழுகை*
இந்த இரவில் செய்ய வேண்டிய நபிலான தொழுகைகளும் உண்டு.
பல்வேறு விதமான தகவல்கள் இதில் உண்டு. அவைகளிலிருந்து எமது குருமகான் அவர்கள் எமக்கு போதித்ததை தங்கள் முன் சமர்ப்பிக்கிறேன்.
இரண்டிரண்டாக ஆறு ரக்அத்துக்கள் தொழ வேண்டும்.
முதல் ரக்அத்தில் சூரத்துல் காபிருன் ஓதவும் அடுத்த ரக்அத்தில் சூரத்துல் இக்லாஸ் (குல்ஹுவல்லாஹு) ஓதி தொழுது துஆச் செய்ய வேண்டும்.
*துஆ*
மிஷ்காத் ஹதீஸ் எண் 1308 விரிவுரையில், அல்லாமா முல்லா அலி காரி ரஹ்மதுல்லாஹி அலைஹி அவர்கள் தனது மிர்காதில் எழுதுகிறார்கள்.
ஹழ்ரத் உமர் இப்னுகத்தாப், ஹழ்ரத் இப்னு மஸ்ஊத் முதலான நாயகத் தோழர்கள் மற்றும் முன்னோர்களான நாதாக்கள் (ரலியல்லாஹுஅன்ஹும்) அதிகமானோரும் பின்வரும் துஆவை ஓதி வந்தார்கள்)
'யாஅல்லாஹ்! நீ எங்களை அபாக்கியவான்களாக பதிவு செய்து இருந்தால் அதை அழித்து எங்களை பாக்கியவான்களாக எழுது. நீ எங்களை பாக்கியவான்களாக எழுதி இருந்தால் அதை அப்படியே உறுதிப்படுத்து ஏனெனில் நீ நாடுவதை அழிப்பாய், நாடுவதை உறுதிப் படுத்துவாய் உன்னிடம் மூல நூல் உள்ளது'. இந்த துஆவை ஷஅபான் 15ஆவது (பராஅத்) இரவில் ஓதியதாக ஹதீஸில் வந்துள்ளது. (நூல்: மிர்காத்)
பராஅத் இரவில் நாமும் ஸஹாபாக்களைப் பின்பற்றி இந்த ஹதீஸில் வந்த துஆவைத் தான் ஓதி வருகிறோம்.
அல்லாஹும்ம இன் குன்த கதப்தனா அஷ்கியாஅ ஃபம்ஹுஹு வக்துப்னா சுஅதாஅ.
வஇன் குன்த கதப்தனா சுஅதாஅ ஃபஅஸ்பித்னா. ஃபஇன்னக தம்ஹு மா தஷாஉ வதுஸ்பிது. வஇன்தக உம்முல்கிதாப்
(யா அல்லாஹ்! நீ எங்களை அபாக்கியவான்களாக பதிவு செய்து இருந்தால் அதை அழித்து எங்களை பாக்கியவான்களாக எழுது.
நீ எங்களைப் பாக்கியவான்களாக எழுதி இருந்தால் அதை அப்படியே உறுதிப்படுத்து. ஏனெனில் நீ நாடுவதை அழிப்பாய் (நாடுவதை) உருதிப்படுத்துவாய் உன்னிடம் மூலநூல் உள்ளது).
இந்த துஆவை ஷாஅபான் 15 ஆவது (பராஅத்) இரவில் ஓதியதாக ஹதீஸில் வந்துள்ளது. (மிர்காத்)
பராஅத் இரவில் நாமும் ஸஹாபாக்களைப் பின்பற்றி இந்த ஹதீஸில் வந்த துஆவைத் தான் ஓதி வருகிறோம்.
நாம் ஓதும் பராஅத் துஆவின் மிகுதமான வாசகம் ஹதீஸிலிருந்து பெறப்பட்டதாகும்.
இமாம் சுயூதி ரலியல்லாஹு அன்ஹு அவர்கள் அத்துர்ருல் மன்தூர் என்ற அவர்களின் தப்சீரில் 13:39 என்ற வசனத்தின் விளக்க உரையில் கூறுகிறார்கள்;
இப்னு அபீ ஷைபா அவர்கள் தனது அல்முஸன்னஃப் என்ற ஹதீஸ் கிரந்தத்திலும் இப்னு அபித்துன்யா அவர்கள் தனது அத்துஆ என்ற ஹதீஸ் தொகுப்பிலும் இப்னு மஸ்ஊத் (ரலியல்லாஹு அன்ஹு) அவர்களின் கூற்றை பதிவு செய்துள்ளார்கள்.
وأخْرَجَ ابْنُ أبِي شَيْبَةَ في «المُصَنَّفِ»، وابْنُ أبِي الدُّنْيا في الدُّعاءِ عَنِ ابْنِ مَسْعُودٍ قالَ: ما دَعا عَبْدٌ قَطُّ بِهَذِهِ الدَّعَواتِ إلّا وسَّعَ اللَّهُ لَهُ في مَعِيشَتِهِ يا ذا المَنِّ ولا يُمَنُّ عَلَيْهِ يا ذا الجَلالِ والإكْرامِ يا ذا الطَّوْلِ لا إلَهَ إلّا أنْتَ ظَهِيرَ اللّاجِئِينَ وجارَ المُسْتَجِيرِينَ ومَأْمَنَ الخائِفِينَ إنْ كُنْتَ كَتَبْتَنِي في أُمِّ الكِتابِ شَقِيًّا فامْحُ عَنِّي اسْمَ الشَّقاءِ وأثْبِتْنِي عِنْدَكَ سَعِيدًا وإنْ كُنْتَ كَتَبْتَنِي عِنْدَكَ في أُمِّ الكِتابِ مَحْرُومًا مُقَتَّرًا عَلَيَّ رِزْقِي فامْحُ حِرْمانِي ويَسِّرْ رِزْقِي وأثْبِتْنِي عِنْدَكَ سَعِيدًا مُوَفَّقًا لِلْخَيْرِ فَإنَّكَ تَقُولُ في كِتابِكَ الَّذِي أنْزَلْتَ ( ﴿يَمْحُو اللَّهُ ما يَشاءُ ويُثْبِتُ وعِنْدَهُ أُمُّ الكِتابِ﴾ ) .
ஸல்லல்லாஹு அலா முஹம்மத் ய ரப்பி ஸல்லி அலைஹி வஸல்லிம்.
தொகுப்பு: TSA அபூதாஹிர் ஃபஹீமீ மஹ்ழரி
ஆசிரியர் - அல் அஸ்ரார் மெய்ஞான மாத இதழ்
98415 67213
www.faheemiyapublishers.com
